| 摘要 |
1930年代ê台灣話文論戰是最近一百冬內底，台灣讀冊人之間頭擺為著台語寫作來鬥爭。《南音》雜誌是這場論戰ê戰場之一，雖然伊ê壽命真短，毋過郭秋生tī hit-tah有創〈臺灣話文嘗試欄〉，mā發表伊對án-tsuánn用漢字來寫台灣話文ê完整理論，伊koh進一步用實際ê創作來證明tsit款主張有路使。〈大耳的入港〉就是伊tī《南音》ê第一篇漢字台語小說ê創作。Tann，台語教科冊ê編寫to是用漢字為主，mā以台語漢字ê教學做台語讀寫ê目標；現時ê台語漢字選用佮郭秋生主張ê台語漢字用字原則phīng無差大碼。用漢字做媒介物是m̄是台語教育ê好法度就是tsit篇論文beh問佮回應ê問題。Tsit篇論文除了簡單介紹《南音》雜誌，koh beh用文本分析ê方式分拆郭秋生ê台語漢字使用原則，以及小說〈大耳的入港〉ê內容佮伊án-tsuánn實踐伊ê漢字用字原則。透過án-ne ê分拆，lán thang了解伊tī台語漢字ê書寫所tú著ê困難。後紲koh來kā郭秋生ê用字原則佮現代台語漢字選用ê法度做pí-phīng。透過án-ne ê pí-phīng，指出用台語漢字做媒介物袂是台語基礎教育ê好法。結論指出，現此時ê台語教育應該用羅馬字做教材ê主體，hōo學生有台語音韻智覺ê好底蒂，了後才來引tshuā in認bat台語漢字ê書寫。 |
