本系初初創立的時就是以台灣文化、語言kap文學三種領域來描寫台灣研究ê未來光景,注重本土kap國際並進、理論kap實務並重、歷史kap當代兼顧、語言擔扛歷史、文學反映文化ê精神,建立明確ê發展目標kap方向,建立完善ê學術kap教學體系,為台灣研究ê發展培養新ê人才。
本系有學士班、碩士班kap博士班,完整iū-koh一貫ê教學體制,是國內學制上kài完整ê台文系所之一,毋但有多元koh濟種語言背景ê師資,mā積極舉辦跨領域ê台灣文化講座、職業發展講座kap國際性學術研討會,koh透過專題計畫將文獻、語料kap實地調查ê成果數位化,而且本系出版ê學術年刊《台灣學誌》(Monumenta Taiwanica)收錄有關台灣文化、語言、文學、歷史、傳播、政治、社會變遷等等台灣研究領域ê學術論文,一方面展現本系ê研究動態,另外一方面mā邀請國內、國外ê學者來討論、對話,完整呈現出台灣研究ê學術深度。
用這做肥底,本系希望學生毋但會當浸佇上好ê教研體系內底,得著專業iū-koh深入ê研究資源,mā會得通開拓多元koh跨領域ê研究視野,予咱佇未來深造ê時koh較有優勢。另外,透過語文傳播kap文化創意產業相關ê課程,kap台語作主體ê中等學校師資培育課程,本系期望替咱台灣ê本土語文教育kap文化建設培育專業ê人才,包括各級文化單位kap文史工作室ê文化行政、文史調查、文獻撰寫人才,koh有中小學本土語言kap文化師資等等;畢業生mā會當進一步投入大眾傳播媒體kap文化創意產業,進行文化推廣kap傳播。佇咧強化台灣研究學術能量ê時,本系mā向望予台灣研究kap社會產生有機ê連結,進一步成做建構台灣主體性ê基礎,期待本系學生未來會當發揮學術、教學ê專長,回饋社會。
未來本系會繼續結合跨領域資源,落實台灣研究ê專業化kap普及化,另外配合本校院級「國際臺灣學研究中心」(International Taiwan Studies Center)ê成立,更加拍拚佇台灣研究ê國際化發展,向望本系ê老師、學生攏會使以在地精神出發,踮台灣徛起,看向全世界,進一步佇世界內底重新建立台灣ê主體性,𤆬領台灣研究ê風潮。