《國家語言發展法》(下爿稱「語發法」) chêng 2019 年公布施行，明定「國家語言」是臺灣各固有族群使用 ê 自然語言 kap 臺灣手語，並規定政府應優先 chhui-sak 面臨傳承危機 ê 國家語言 ê 教學、資源、制度 kap 使用環境（第六、七、八條）。為落實語言平權理念，文化部 leh 2021 年召開頭一擺「國家語言發展會議」(下爿稱「語發會議」)，提出政策方向 kap 行動目標，2024 年舉辦第二屆會議，進一步整合各語言復振事務 ê 部會分工 kap 公民參與意見。
文化部拍算 leh 2026 年舉辦第三屆國家語言發展會議，自 án-ne「臺灣台語政策論壇」(下爿稱「本論壇」)預定 tī 國家發展會議進前，先收集台語政策發展建議，提供語發會議做基礎資料。本論壇專門負責針對台語政策進行深入討論 kap 建議整理，分別 tī 南部、中部、北部 kap 東部辦理四場論壇，整理各地意見，形成有前瞻性 ê 政策意見基礎。本論壇 ē 邀請學者、民間團體、 教育 kap 出版等相關實務工作者，共同探討 leh 國家語言政策 chhui-sak ê 過程中，台語所面臨 ê 制度落差 kap 現場困境。《語發法》已明定各級政府應保障人民 leh 教育、行政、司法等程序中使用國家語言 ê 權益，m̄-koh 實際施行層面猶原存在濟濟問題：
- 教育制度 kap 語言政策相連困難，課程落實 kap 師資培育 iáu 真欠缺
- 家庭 kap 社區語言意識欠缺，母語傳承面臨斷線風險
- 通譯制度推展有限，公部門語言友善環境 iáu 無完善
- 地方通行語雖 bóng 有法源依據，實際執行 soah 進度 ǹg-tǹg
Chia–ê 現象顯示，語言轉型正義 iáu 未充分落實，國家語言政策 kap 教育、文化、社會各系統之間 ê 連結 kap 支持機制 iáu 需要強化。為此，論壇透過跨區域、跨領域 ê 公民對話機制，整合語言學、文學、教育學、社會學、出版傳播等專業領域智識，廣泛採納各界實務經驗 kap 觀察，期待 ē-tàng 提出兼具在地性 kap 未來性 ê 政策建議。論壇以「深化語言平權理念、實現台語社群語言權益」為目標，chhui-sak 多語共存 ê 韌性社會。
論壇議程場次：
- 2025年12月13號（六） 南部論壇：『轉型正義、語言傳承 kap 文化平衡』
- 2025年12月28號（日） 中部論壇：『台語語言政策、語言意識 kap 語言聲望 ê 建立』
- 2026年1月10號（六） 東部論壇：『語言景觀 kap 語言活力』
- 2026年3月6號（五） 北部論壇：『台語正常化』